Янв 29 2017
Сӧстерi паза кӧӧ П. Боргояковти
Кӧрін турған чылтызах
Ай хараана сустал тур.
Син, чылтызах, ырахсың,
Минзер киліп полбассың.
Ой, чылтызах, чылтызах,
Ноға андағ ырахсың?
Ай хараана кӧрініп,
Кӱн хараанаң тисчезің.
Халын пӱрліг чахайах
Уғаа истіг узуп тур.
Кӧзенек хыринда, узубин,
Сині сағып одырдым.
Пӧзік ырлапча постарғай,
Таң чариина чидікпин.
Син, чылтызах, хапчығай
Минің алныма учух кил.
By sarynzhy • Боргояков П.М., Боргояков П.М., Сарыннар сӧстерi •
Янв 29 2017
Сӧстерi паза кӧӧ П.Боргояковти
Хараа-кӱнӧрте сағын чӧрчем,
Пу ла чолны ундутпин.
Кӧрін турған син, чолыҷах,
Ноға андағ сілігзің?
Син парғазың пу ла чолҷа,
Чолыҷааңа кӧӧленіп,
Ам кемні-де мин сахтапчам,
Парған синің чолыңда.
Ыр хозымы:
Табырах, табырах мин парарға,
Орай, орай полғанӌа.
Табырах, табырах пар полбазам,
Олох мині син сахта.
Мині тутпа син, чолыҷах,
Олох таа мин парарбын.
Орайладып мин салзам,
Олох мині син сахта.
Тоғазарға чидікпинчем,
Чолҷа киліп адыма,
Аны кӧріп, минің чӱреем
Сабылып тур кӧксімде.
Ыр хозымы.
By sarynzhy • Боргояков П.М., Боргояков П.М., Сарыннар сӧстерi •
Янв 29 2017
Сӧстерi М.Кильчичаковти, кӧӧ А.Кенельни.
Алтын чӱстӱгім, минің алғаным.
Айланып килбес, хайди пол парды?
Азыр ханаттығ хусхаӌахтарым,
Ағыл пиріңердек арғызымны!
Хызыл хыр аттығ минің хынғаным
Харчи айланмас, хайди пол парды?
Хызыл кӧгістіг хусхаҷахтарым,
Хығыр киліңердек хынғанымны!
By sarynzhy • Кенель А.А., Кильчичаков М., Сарыннар сӧстерi •
Янв 29 2017
Сӧстерi А.Топановти, кӧӧ А.Кенельни
Хайди полып, хан чӱрееӌеем,
Хайнап уғаа кӱрсӱледің зе?
Хайди полып, пӱӱн, ӧӧреӌеем,
Хатап минзер килбедің зе?
Хынығ ӱннер чайылчадыр
Хыылах танның ойлазында,
Хынған ӧолғым тоғынчадыр
Хыра тартып тракторында.
Кӧӧленгенім айланыбызып,
Кӧрчем, холын пулғапча.
Кӧңнім ағаа тың на паарсап,
Кӧре ле чазал пастапча.
Хырых сӱрмес ӱріп алып,
Хызыл пладым мин тартынчам.
Хынғанымзар пастыр парып,
Хынығ тоғыста полысчам.
By sarynzhy • Кенель А.А., Сарыннар сӧстерi, Топанов А. •
Янв 29 2017
Сӧстері Е. Тыгдымаевани, кӧӧ Н.Катаевани
Чахсы, айас кӱскӱ хараалар,
Пызыңнасчатхан чылтыстар,
Тискертін сапхан таныӌах,
Чӱрекке чағын айыӌах
Ырахта суғ хорлап ахча,
Харааның амырын талап,
Хыс ӌӱрегі отнаң кӧйче,
Чалғыс часканы ла сағып.
Хайда-да гармонь ойнапча,
Чӱрвк сысталдыра тартып.
Хызыҷахтар хатхырысча,
Сох чоохтар чоохтазып.
Че пілчебін, син килбессің,
Тымых сіліг хараада
Алтын пуғдай талайынӌа
Комбайннаң устап чӧрчезің.
Чалбах чазы ортызында
Синің одың чарыпча.
Сині харап орайда,
Чалғыс чӱреем чобалча.
Ырахта суғ хорлап ахча,
Харааның амырын талап.
Хыс чӱрегі отнаң кӧйче,
Чалғыс часканы ла сағып,
By sarynzhy • Катаева Н.В., Сарыннар сӧстерi, Тыгдымаева Е. •
Янв 29 2017
Сӧстері И.Костяковти, кӧӧ А. Кенельни
Кӧзенек хыринда алӌазып,
Кизек нымыртах ӧңнен тур.
Кӱннің сай иирде молӌазып,
Кӧӧленгенім сағып тур.
Хынғаным килзе, ол ағас
Хығырча мині кӱӱлеснең.
Кӧңнімні алған оолағас
Кӧйдірче чӱреем чалыннаң.
Порчозы нымырт ағастың
Парчан сулғапча чир кӧксін.
Паарсазы ынағ оол-хыстың
Палың чазапча чиит кӧңнін.
Халын ӧңненіңер, нымыртгар,
Харааңар хойығ палыңнир.
Хынызып чӧріңер ам, чииттер,
Хаӌан даа часка учурир.
By sarynzhy • Кенель А.А., Костяков И.М., Сарыннар сӧстерi •
Янв 28 2017
Внёс ещё пять текстов песен на хакасском языке. На данный момент пока на сайте 85 текстов. Как только доведу до 100 песен, планирую дополнительно начать собирать песни и на алтайском языке. Такая задумка возникла из-за близости языковых культур этих двух народов: алтайцев и хакасов.
Названия новых текстов:
By sarynzhy • Новости сайта •
Янв 28 2017
Сӧстерi М.Кильчичаковти, кӧӧ А.Кенельни
Халын тайғаӌаам, кӧк тайғам,
Хайдағ хайхастығ сілігзің!
Хараазы читсе, кӧк тайғам,
Хырых аймахти ӱннігзің.
Ыр хозымы;
Хайда даа чӧрзем, ой, кӧк тайғам, тидір,
Сині сағынчам, ой, кӧк тайғам, тидір.
Ах хар пӧріктіг тағларың
Хайди ундирбын, кӧк тайғам?
Сӱлейке осхас суғларың
Иліг азырлығ, кӧк тайғам.
Ыр хозымы.
Хуӌахтап турған тастарың
Хоных кӧдірче, кӧк тайғам.
Чабын турған ағастарың
Талайӌа чӱсче, кӧк тайғам.
Ыр хозымы.
By sarynzhy • Кенель А.А., Кильчичаков М., Сарыннар сӧстерi •
Янв 28 2017
Сӧотерi Н.Доможаковти, кӧӧ чонни.
Чазызар сығып, сарнасса,
Чахайах пазы чайхалғай,
Чахсы марғызып тоғынза,
Часкалығ хоных пик полғай.
Тайғазар сығып ӱн салза,
Тасхыл пастары сооласхай,
Табырах чоннаң тудынза,
Талалбас хоных тыып турғай.
Толғалып аххан Ағбан суғ
Тоғыр тағларны тобырча.
Тоғыста чапчаң чиит улус
Тооза странаға сабланча.
Игірлеп аххан Ағбан суғ
Илбек хыраны суғлапча.
Істеністе сымдах чиит улус
Истіг Москвада махтатча.
By sarynzhy • Доможаков Н.Г., Сарыннар сӧстерi, Чонни •
Янв 29 2017
Саңызах (И.Костяков — А.Кенель)
Сӧстерi И.Костяковти, кӧӧ А.Кенельни
Ой істінде чулыӌах
Ойнап, сарнап толғалча.
Аннаң хости саңызах
Ах порчонаң сулғанча.
Хыр ӱстунде харағай
Хылбаңнап тур хыныснаң,
Саңызах ла абахай
Нандырбинча паарсаснаң.
Чылдаң чылға саңызах
Чалғызан на ӧңнен тур.
Аның чӱреен чулыҷах
Алып алып кӧӧлен тур.
Ойда турған пу саңыс
Хырзар чир дее ол сыхпас,
Сах андағох пiстiң хыс
Хынған оолғын тастабас.
By sarynzhy • Кенель А.А., Костяков И.М., Сарыннар сӧстерi •