Янв 15 2017

Ырызым (В.Шулбаева — Г.Танбаев)

Сӧстері Валентина Шулбаевани, кӧӧ Герман Танбаевти

Чар ӱстӱнде мин турчам, ыраххызар харапчам.
Арғызым парыбысхан, ырызым апарыбысхан.
Син пілбинчезің мині, хайди хынчам мин сині,
Кӱн дее салбинча мағаа, чир ӱстӱ харасхыда.

Ыр хозымы:

Чӱреегімде пус!
Чӱреегімде пус!
Аны хайылдыр полбас тус,
Аны хайылдыр полбас тус.
Хайдазың минің хынызым?
Сіліг харахтығ айдазым.

Ноға мағаа хынмадың, пасхазынзар парыбыстың?
Сіліг полбам ма сағаа, чылиим читпеен ме паза?
Синзің минің ӱлӱзім, хада хонған чалғызым,
Сині мин ундутпаспын, ырызымны сағирбын.

Ыр хозымы:

By • Сарыннар сӧстерi, Танбаев Г., Шулбаева В. •

Янв 15 2017

Школаҷаам (В.Шулбаева — Г.Танбаев)

Сӧстері В. Шулбаевани, кӧӧ Г. Танбаевти

Пар чир ӱстӱнде тура,
Чарых сағызым андар тартча.
Тилекейге ол сабланча,
Нанҷы-арғыстарынаң хада.

Ыр хозымы:

Адам полып — чолым асхазың,
Ӏҷем полып — піліс пиргезің.
Палаларың син ӧскіргезің
Ырыс сыйлап хонығ салғазың.

Алғыс, школаҷаам! Адың ундулбас.
Ӧңнен, школаҷаам! Тӧлің чіт парбас.
Школам — минің чарых ӱлӱзім!
Школам — минің успас хынызым!

Пӱӱн дее син тілегдезің
Наа чайаачылырны асчазың.
Ӱгретчілеріңнең кӱстігзің,
Чооныңа турыстығ тӧллігзің.

Ыр хозымы:

By • Сарыннар сӧстерi, Танбаев Г., Шулбаева В. •

Янв 15 2017

Школанаң чарылыс (В.Майнашев — Г.Танбаев)

Сӧстері Валерий Майнашевти, кӧӧ Герман Танбаевти

Таң алнын піс тахтада удурлабыс,
Чӱрекке кірче хайдағ-да чарых сағыс.
Тиректернең суулап Ағбан суғ ахча,
Тӱгенч,і чылтыс тигір тӱбінде усча.

Ыр хозымы:

Пӱӱн піс школабыстаң чарылысчабыс,
Чахайахтар ӱріп тастапчабыс.
Анымңох чарых тус, анымңох саңай,
Синің омаң чӱреебісте халғай…

Таң алнынзар ізеніснең кӧрчебіс,
Наа чоллар, піске азылар киртінчебіс.
Таң алны хызарча тиин хады чіли,
Прай чирде истілче аймах хустар ӱні.

Ыр хозымы:

Чахайахтар ырахтын хол сапчалар,
Анымңохтазып олған тузыбыс парча.
Таң алнын піс тахтада удурлабыс
Чӱреебісте сабылча ол чарых сағыс.
Ыр хозымы:

By • Майнашев В.Г., Сарыннар сӧстерi, Танбаев Г. •

Янв 15 2017

Чыллар табырах хайылча (В.Шулбаева — Г.Челбораков)

Сӧстері В. Шулбаевани, кӧӧ Г.Челбораковти

Чыллар табырах хайылча,
Кӱмӱс хыролар сабылча,
Чӱрееҷеем кӧлҷеен сиртклепче,
Ниме-де миннен, ырапча.

Ыр хозымы:

Кӧгілбей тағлар,
Ырахта читпеңер!
Чарых омалар,
Чӱреемде халыңар!

Суғларым соолбин ахсалар,
Хустар тымылбин тапсазар,
Ол, ӧӧрем, амыр, пик чуртас,
Хорабас арығ сын чапсыс.

Порчолар сіліг мондылза,
Чиріӌеем аймах ӧңненер,
Ол нооза, ӧӧрем, сын хайхас,
Тик парбас улуғ поғдархас.

By • Сарыннар сӧстерi, Челбораков Г., Шулбаева В. •

Янв 15 2017

Чирім (О.Иптышева — И.Штыгашев)

Сӧстері Ольга Иптышевани, кӧӧ Иван Штыгашевти

Тӧреен чирім тиң чазы
Сілииң синің кӧк чазы.
Пуғдай ӧскен кӧк чазы
Алып чонның тоғызы.
А-а-а-а-аааа, ааааааа…

Хынған чирім кӧк тайға
Пирік чолда тун тайға.
Тының синің пай тайға
Алып чонның хойнында.
А-а-а-а-аааа, ааааааа….

Хайхастығзың алып чон,
Сынға хынған сіліг чон.
Хонииң синің кӱлӱк чон,
Пай чуртасха кӧні чол.
А-а-а-а-ааааа, ааааааа….

By • Иптышева О., Сарыннар сӧстерi, Штыгашев Иван •

Янв 15 2017

Чирім хустары (К.Кильчичаков — Г.Челбораков)

 Сӧстері К. Кильчичаковти, кӧӧ Г. Челбораковти

Хырлар азыра учуххан хустар
Хысхыр читтілер ирке чиріме.
Тасхыл азыра учуххан хастар
Тапсас килділер ирке чиріме.

Порчо, пӱрлернең чирім чабынча,
Аарлығ хустарға чӱрее паарсапча.
Хараа-кӱнӧрте чилім толғалча,
Хустар хырғалған чӱгін сыйбапча.

Сіліг кӧглерің кӱннің истерге,
Ӧӧрліг хустарым, пір дее тӱӱлбеспін.
Порчо аралии ӧрін чӧрерге
Кӧңнім киреенңе тастап полбаспын.

By • Кильчичаков К., Сарыннар сӧстерi, Челбораков Г. •

Янв 15 2017

Чирім пулии (А.Халларов — Г.Танбаев)

Сӧстері Андрей Халларовти, кӧӧ Герман Танбаевти

Ачын хаап, кӱннің сузын
Пори ісчем арығ кӧӧнең.
Чайғы ырын, ӧңзіс тузын
Чилбеп чӧрбін ханнығ ӧртнең.

Ыр хозымы:

Экей, истиим! Чирім пулии!
Хуҷааң мині абыт турча.
Кӧксім ыры, ханым чылии
Синде кӱстіг сыхтанча.

Хустар тахпаан хыс хазыңнаң
Хобрах мағаа тілбестепче.
Илбек тыттар пастарынаң,
Ирлер чіли икселісчелер.

By • Сарыннар сӧстерi, Танбаев Г., Халларов А. •

Янв 15 2017

Чиит ӧӧремнеңер (Е.Тыгдымаева — О.Токояков)

Сӧстері Е. Тыгдымаевани, кӧӧ О. Токояковти

Орай тигірнің чылтызын санап,
Сайлығ чолынҷа мин парчам ипти.
Ос ағастар айнаң чарызып
Сууласчалар сағысты сайби.

Хайдазың амды, ӧӧрем син минің?
Хайдағ тоғыста істен чӧрзің ам?
Хара харахтығ, абахайым,
Хара чібек састығ, хынғаным.

Сағынчазың ма, ам син миннеңер
Чазы чирінде син тынанчатсаң.
Сарыннар сарнапчам синнеңер
Тӱн хараазы даа тӱс парчатса.

Сыйбапчам амды, синің сазыңны
Хызарып одырып, таң чарыза.
Ӧріне кӧрчем мин омаңны
Кӱскӱ тоғыстары тоозылза.

By • Сарыннар сӧстерi, Тыгдымаева Е., Челбораков Г. •

Янв 15 2017

Чатханым (А.Халларов — Г.Танбаев)

Сӧстері А. Халларовти, кӧӧ Г. Танбаевти

Сыңылос ӱнніг чатханда,
Чоным ӱнін мин исчем.
Харчанып одырған апсахта,
Чоным кӧңнін мин пілчем.

Соолазын сірернің ӱніңер,
Тайға кӱзінең пip халбин.
Ағбан салғаның хыр ӧӧңін
Аймахха читірзін майыхпин.

Читіргле апсах-чатханым,
Чирімнің кӧгліг суулазын.
Махтаңар ӱнге ачынмин,
Кӱстіг чуртастың кӱӱлезін.

Ас-тамахтың тоғын талғанны,
Чазым чонға ӧскірче тіп,
Сухсунньің артығы айраны
Саны чох малым пирче тіп.

Сын нимес пе, чатханым,
Пістің хыстар кӱн не осхас.
Кем саба тиир, чатханым,
Ирлер пістің алып осхас.

Сӧле-чоохта, апсах-чатхан,
Кӱнніг Хакасия, мини тіп!
Ырла-сарна, аарлығ нанңым,
Чиит-хыр Хакасия, минмін тіп!

By • Сарыннар сӧстерi, Танбаев Г., Халларов А. •

Янв 15 2017

Часхы хараалар (Е.Тагира — Г.Танбаев)

Сӧстері Елена Тагирани, кӧӧ Герман Танбаевти

Синнең піс тоғасхабыс
Харасхы хараада.
Нымырт чызы тадылығ,
Пас айландырған.

Синің чылығ сӧстерің
Чылтыстар алтында,
Хайда-да арығда хус
Сарынын салған.

Ыр хозымы:

Са-са-са, сағыстар,
Са-са-са, сағыстар,
Мині апарчалар.
Ча-ла-хай тустарның,
Ча-ла-хай тустарның,
Чарых хойнынзар.

Чылтыс салғах охсанча,
Амыр суғ ӧтіре.
Чылтыс одынаң кӧйче
Часхы хараалар.

Ирге парчатхан хыстар,
Нымырт ағастары.
Тадылығ тӱстер мағаа
Ам сыйлапчалар.

By • Елена Тагира, Сарыннар сӧстерi, Танбаев Г. •

«< 5 6 7 8 9 >»