Чонни

Сӧстерi паза кӧӧ чонни

Ах чазының порчозы,
Айы читсе, алӌасхай.
Армияа парған арғызым
Алтын медальлығ айланғай.

Кӧк чазының порчозы,
Кӱні читсе, алӌасхай.
Кӧңніме кірген арғызым
Кӱмӱс медальлығ айланғай.

Сӧстерi паза кӧӧ чонни.

Пiр саринаң кӱн салза,
Пір саринаң саларох.
Пір ле оолға кӧӧлензе,
Пасхазы даа хынарох.

Хызылғаттың ағазын
Кем не сындыр салды ни?
Хызыл наахтығ оолағас
Ноға мында чоғыл ни?

Харағаттың ағазын
Кем не сындыр салды ни?
Хара харахтығ оолағас
Ноға тастап парды ни?

Амох сығар чарых кӱн
Хара пулут кистінең.
Амох килер оолғыҷаам
Пӧзік тағлар кистінең.

Алексей Ананьевич Шурышевтең пазылған, 1944 ч.

Чалбырандыра от тамыстым,
Чайым хайди хайнабинча?
Чарым кӱнӌе сағын салдым,
Чалахайым ноға килбинче?

Ах чазыны салғыдып,
Адым сыдабин, айландым.
Арғызым, синi сағынып,
Ал чӱреемнең сағыдым.

Сӧстерi паза кӧӧ чонни

Азыр тағның тӱлгӱзін
Аттығ сӱрзеңер тударзар.
Алар ползаңар позымны,
Адам чирінзер парарзар.

Игір тағның тӱлгӱзін
Ибір пілзеңер тударзар.
Изертер ползаңар позымны,
Инем чирiне парарзар.

Сӧстерi паза кӧӧ чонни

Суғдаң сусхан суғ нимес,
Сууласпин ісчең ас нимес.
Сайдаң сусхан суғ нимес,
Сарнаспин ісчең ас нимес.
Кӧлдең сусхан суғ нимес,
Кӧглеспин ісчең ас нимес.

Сӧстерi Онаска Катановти, кӧӧ Н.Катановти.

Ах порам чортхан чирлерде
Ах порчо пастығ от ӧскей.
Алар ла минің хызыма
Алтын порағлығ сас ӧссін.

Кӧк порам чортхан чирлерде
Кӧк порчо пастығ от ӧскей.
Кӧӧленген минің хызыма
Кӱмӱс порағлыг сас ӧссін.

Евдокия Павловна Майнагашевадаң пазылған, 1945 ч.

Алты пулуңнығ ах ибің
Айға сусталып турчатсын,
Арғалдаң алған наа пала
Ах хыр сапханӌа чуртазын.

Кӧзенектіг кӧк тураң
Кӱнге сустапып турчатсын.
Кӧп чоннаң алған наа пала
Кӧк хыр сапханӌа чурт салзын.

Сӧстерi паза кӧӧ чонни

Адаӌаам аниина алтандырып алып,
Ах Ӱӱс индіре апарчатхайлар, тидір.
Арғал чирінде мин чӧрчетсем, тидір,
Адам чох полғай арғал чирінде, тидір.

Іӌеӌеем аниина алтандырып алып,
Иргі Ӱӱс индіре индірчеткейлер, тидір,
Илнің чирінде мин чӧрчетсем, тидір,
Іӌем чох полғай илнің чирінде, тидір.

Анна Кирилловна Коковадаң пазылған, 1947 ч.

Аптын чӱгенніг ат тутсам,
Алтанарзар ба, туғаннар?
Алтон сӱрместіг хыс алзам,
Тарынарзар ба, туғаннар?

Кӱмӱс чӱгенніг ат пирзем,
Мӱнерзер бе, туғаннар?
Читон сӱрместіг хыс сурзам,
Тарынарзар ба, туғаннар?

Сӧстерi паза кӧӧ чонни

Сараадымның хузуриин
Сарып килдім, худағай,
Салып пирген иреедімні
Салғалдырбин ал, худағай.

(Сарыспин)

Тораадымның хузуриин
Толғап килгем, худағай,
Толдыра салған иреедімні
Тӧкпин ал пирдек, худағай.

(Тӧле албин)