Сӧс ээзi

Янв 15 2017

Чирім пулии (А.Халларов — Г.Танбаев)

Сӧстері Андрей Халларовти, кӧӧ Герман Танбаевти

Ачын хаап, кӱннің сузын
Пори ісчем арығ кӧӧнең.
Чайғы ырын, ӧңзіс тузын
Чилбеп чӧрбін ханнығ ӧртнең.

Ыр хозымы:

Экей, истиим! Чирім пулии!
Хуҷааң мині абыт турча.
Кӧксім ыры, ханым чылии
Синде кӱстіг сыхтанча.

Хустар тахпаан хыс хазыңнаң
Хобрах мағаа тілбестепче.
Илбек тыттар пастарынаң,
Ирлер чіли икселісчелер.

By • Сарыннар сӧстерi, Танбаев Г., Халларов А. •

Янв 15 2017

Чиит ӧӧремнеңер (Е.Тыгдымаева — О.Токояков)

Сӧстері Е. Тыгдымаевани, кӧӧ О. Токояковти

Орай тигірнің чылтызын санап,
Сайлығ чолынҷа мин парчам ипти.
Ос ағастар айнаң чарызып
Сууласчалар сағысты сайби.

Хайдазың амды, ӧӧрем син минің?
Хайдағ тоғыста істен чӧрзің ам?
Хара харахтығ, абахайым,
Хара чібек састығ, хынғаным.

Сағынчазың ма, ам син миннеңер
Чазы чирінде син тынанчатсаң.
Сарыннар сарнапчам синнеңер
Тӱн хараазы даа тӱс парчатса.

Сыйбапчам амды, синің сазыңны
Хызарып одырып, таң чарыза.
Ӧріне кӧрчем мин омаңны
Кӱскӱ тоғыстары тоозылза.

By • Сарыннар сӧстерi, Тыгдымаева Е., Челбораков Г. •

Янв 15 2017

Чатханым (А.Халларов — Г.Танбаев)

Сӧстері А. Халларовти, кӧӧ Г. Танбаевти

Сыңылос ӱнніг чатханда,
Чоным ӱнін мин исчем.
Харчанып одырған апсахта,
Чоным кӧңнін мин пілчем.

Соолазын сірернің ӱніңер,
Тайға кӱзінең пip халбин.
Ағбан салғаның хыр ӧӧңін
Аймахха читірзін майыхпин.

Читіргле апсах-чатханым,
Чирімнің кӧгліг суулазын.
Махтаңар ӱнге ачынмин,
Кӱстіг чуртастың кӱӱлезін.

Ас-тамахтың тоғын талғанны,
Чазым чонға ӧскірче тіп,
Сухсунньің артығы айраны
Саны чох малым пирче тіп.

Сын нимес пе, чатханым,
Пістің хыстар кӱн не осхас.
Кем саба тиир, чатханым,
Ирлер пістің алып осхас.

Сӧле-чоохта, апсах-чатхан,
Кӱнніг Хакасия, мини тіп!
Ырла-сарна, аарлығ нанңым,
Чиит-хыр Хакасия, минмін тіп!

By • Сарыннар сӧстерi, Танбаев Г., Халларов А. •

Янв 15 2017

Часхы хараалар (Е.Тагира — Г.Танбаев)

Сӧстері Елена Тагирани, кӧӧ Герман Танбаевти

Синнең піс тоғасхабыс
Харасхы хараада.
Нымырт чызы тадылығ,
Пас айландырған.

Синің чылығ сӧстерің
Чылтыстар алтында,
Хайда-да арығда хус
Сарынын салған.

Ыр хозымы:

Са-са-са, сағыстар,
Са-са-са, сағыстар,
Мині апарчалар.
Ча-ла-хай тустарның,
Ча-ла-хай тустарның,
Чарых хойнынзар.

Чылтыс салғах охсанча,
Амыр суғ ӧтіре.
Чылтыс одынаң кӧйче
Часхы хараалар.

Ирге парчатхан хыстар,
Нымырт ағастары.
Тадылығ тӱстер мағаа
Ам сыйлапчалар.

By • Елена Тагира, Сарыннар сӧстерi, Танбаев Г. •

Янв 14 2017

Чалахай часхы (С.Толмашов)

Кӧӧ паза сӧстері С. Толмашовти

Иртенгі чараан кӱн хараағы
Прай чирге таразын.
Часхының сіліг кӧглері
Хынызым айландырзын.

Паарымда пысхан сіліг сӧстерім
Прай чирге таразын.
Чахайахтарның кӧглері
Чиит чӱреемні хайнатсын.

Ыр хозымы:

Чалахай часхы кӱннері
Чиит чӱреемні хайнадып,
Часхының сіліг кӧглері
Хыныс ағылзын.

Часхыда тӧреен кӱн чахайаағы
Прай чирге таразын.
Чазыдағы торғайағас
Сіліг порчоға сарназын.

Тасхылда тӧӧреен, минің суғларым
Тохтабин солбыразын.
Тадар чонымның кӧглері
Прай чирге истіл турзын.

By • Сарыннар сӧстерi, Толмашов С., Толмашов С. •

Янв 14 2017

Хыныстың ыры (А.Толмашов — Г.Челбораков)

Сӧстерi Ал.Толмашовти, кӧӧ Г. Челбораковти

Чазы чалбахта кӧңнім толбин
Порчо арали пастыр чӧрчем.
Чӱреем хынызын амырат полбин
Чӧре ле піди сарнап чӧрчем.

Часхы чазының аймах оды
Чалғыс позымны часхарбинча.
Кӧксімнең сыххан хыныстың ыры
Кӧленгеніме чит полбинча.

Пазымны сыйбаан арса таным
Кӧк от пазынңа син ойлирзың.
Парымнаң тӧреен кӧӧленізімні
Кирек кізіме читірерзің.

By • Сарыннар сӧстерi, Толмашов А., Челбораков Г. •

Янв 14 2017

Хынызың хайда? (Е.Тагира — Г.Танбаев)

Сӧстер Елена Тагирани, кӧӧ Герман Танбаевти

Син мағаа хынарбын тіп,
Сіліг чоохтабазың ма?
Кӱн чахайағынаң ӧңненіп,
Амды ол чох пол парды ба?

Уғаа тың хынарбын тіп,
Мағаа сӧс пирбезің ме?
Кӧӧк сарыны ла чіли
Хынызың тоозылды ба?

Ыр хозымы:

Хара харахтарынаң
Син минзер кӧрбезің ме?
Ноға чазырчазың за ам,
Хынызың саңай соолды ба?

Ай алтында тоғазарбыс,
Мағаа сӧслебезің ме?
Пулутнаң ноо чабын салдың,
Хынызың тоозыл парды ба?
Ыр хозымы:

By • Елена Тагира, Сарыннар сӧстерi, Танбаев Г. •

Янв 14 2017

Худай салған чир (А.Курбижекова — Ю.Киштеев)

Сӧстері А. Курбижековани, кӧӧ Ю. Киштеевти

Тӧреен чирім, Хакасияа
Аалҷы кізілер хайхапчалар:
«Пу Худай салған чир пулиин
Чоныма сыйлаан Чайаанар».

Ыр хозымы:

Тирең суғлар, ибіре айланып,
Ап-арығ суун апарчалар.
Алтын-кӱмӱс чіли соғланып,
Арығ Кӱн-Айнаң сыхчалар.

Тасхыл тигірге тіри наалып,
Алыптар чіли турысчалар.
Илбек тоолай аң-хустар,
Ыр-кӧг чайып махласчалар.

Айланып турған чир ӱстӱнде
Чарых айастың алтында,
Артыхтаң артых чирібіс
Амыр, чалахай чоннығбыс.

By • Киштеев Ю.Е., Курбижекова А., Сарыннар сӧстерi •

Янв 14 2017

Хайдазың, іҷең (В.Шулбаева — Г.Танбаев)

Сӧстері Валентина Шулбаввани, кӧӧ Герман Танбаевти

Ағын суғ ах парыбысхан,
Аны паза сӱрізіп чит полбас.
Іҷем минің наныбысхан
Паза минзер ол айланмас.

Ыр хозымы:

Мин тілепчем сині,
Тастап парба мині.
Хайдазың іӌең, ӱндес,
Часхар сал мині кӧмес.

Нымырт сіліг алҷасча,
Син аны кӧрбинчезің.
Арығда кӧӧгес тапсапча,
Син аны испинчезің.

Ыр хозымы:

By • Сарыннар сӧстерi, Танбаев Г., Шулбаева В. •

Янв 14 2017

Хайда-да ойнапча гармонь (С.Табаева — Г.Челбораков)

Сӧстері С. Табаевани, кӧӧ Г. Челбораковти

Хайда-да ойнапча гармонь,
Аал аралии сарын чайып.
Табырах, ӧӧреҷем, параң,
Ойнапча, хығырча гармонь.

Сығарчам торғы кӧгенем,
Састырып иптіг салыним.
Че син дее сала маңзыран,
Сарнапча, хығырча гармонь.

Хоостығ пладымны тартыним
Сағыдах, аарлығ ӧӧреҷем!
Хайди киліспинҷе монӌиим!
Сарнапча, ӧстепче гармонь.

Кӧріндес хыринда тураң —
Кемнер ол піссер кӧрчеткен?
Тыңна маңзыраба, тыңнан —
Ноға да ылғапча гармонь.

By • Сарыннар сӧстерi, Табаева С., Челбораков Г. •

«< 5 6 7 8 9 >»

Сӧс ээлерi

Кӧг ээлерi

Кӧглес ӧмелерi

↑

© Хакас чонның кӧглерi 2026
Powered by WordPress • Themify WordPress Themes