Янв 5 2017
Хосров мин нимеспiн, хыйға Низами,
Поэттер кӱлӱгiнең пӱӱнгi Джами.
Че пазымнығ позым сiрерге тiпчем:
Оларның чолларын ӱгренiп чӧрчем.
Низами хыйға сӧзi саңай даа утсын,
Берда, Гянджу, Рум ағаа пазырзын;
Саңай даа Хосров тiлi мининең пай,
Индустан чирiн ол посха чаалап алғай;
Саңай даа Иранға Джами ырлазын,
Аравийде тӱӱрелер Джамигек сапсын,
Че тӱрiктер родын хайдағ даа чирде,
Прай тӱрiктер изiн тутчам мин холда!..
Янв 5 2017
Сӧстерi Г.Тукайни, кӧӧ Сибдей Томни. Тiлбестеен Сибдей Том
Тӧреен тiлiм, хынған тiлiм, пабамның-iҷемнiң тiлi!
Чир ӱстӱндегi кӧп нименi тӧреен тiлiмнең пiлдiм!
Иң пастап тӧреен тiлнең iҷем пизiкте ырлаҷаң,
Анаң соонаң хараа тооза ууҷам нымахтар салҷаң.
Тӧреен тiлiм! Хайдағ даа туста полысчым пол турҷаңзың син,
Кiчiгдеңӧк хада ӧскенiм, ӧрiнiс-хомзынызым.
Хынған тiлiм! Синде тӧреен иң ызых сӧстерiмнiң iзии:
Худайым полып ал халдах минi, iҷем-пабамның хылиин!
Янв 4 2017
Сӧстерi Я.Тиспирековти, Кӧӧ Г.Челбораковти.
Ой, нымырт, — ax омалығ син ағазах,
Син кӧрчезің, мин хайди сағаа хынчам.
Синің ӱчӱн, истіг амырны тасти,
Кизек пӱкче улуғ арығзар парчам.
Часхы туста арығда
Ах платтығ турчазың,
Тадылығ ла чызыңны
Миннең хыя ысчазың.
Син чох чуртастың сілии мағаа читпеен.
Чуртым хыринда ӧстек, нымыртыӌаам!
Кӱннің дее сай сині мааннап чӧрчетсем,
Арығ кии тынызын мин синнең тынам.
Часхы туста арығда
Ах платтығ турчазың,
Тадылығ ла чызыңны
Мағаа читір полбадын.
Чалахай нымырт, нота.
Янв 4 2017
Сӧстерi М.Баиновти, Кӧӧ Сибдей Томни.
Чаным чалбыран хыс кӧрзем,
Чайаан салған тыӌеңмiн.
Чаным сарынын чаап салзам,
Час палығ халчаң чанымда.
Кӧксiмнi ӧртен хыс кӧрзем,
Худай салғаны тiӌең мин .
Кӧксiм сарынын кӧӧм салзам,
Ханнығ ic халчаң истiмде.
Чабыра пасхан одыңны
Чарчых таа салзаң тамылбас.
Частығып парган часкаңны
Чапсыр таа чӧрзең чапсынмас.
Ӱзӱрiп салган одыңны
Ӱбӱр тее чатсаң чир койбес.
Ӱзiлiп парган хонығың
Уластарзың даа пiрiкпес
Адам чулазы — ах ызых,
Арғамӌы кӧрбин ойлазын.
Аарлазын ӧскен ас чоным
Арда хызылбин чуртазын.
Ӏӌем чулазы — кӧк ызых
Кӧлігні кӧрбин ойлазын.
Кӧӧленген минің ас чоным
Кӧрерге сіліг чуртазын.
Янв 2 2017
Сӧстерi А. Тюкпеевти, кӧӧ Г. Челбораковти
Хайдаң килдiң, часхы таң,
Чиит чӱрееме урундың?
Хайда чӧрдiң, часхы тан,
Кемнiң кӧңнiн ағылдың?
Ӧңнiг чолдаң, часхы тан,
Кӱн порчозын ағылдың,
Кӧглiг чулның, часхы тан,
Ыр-сарынын читiрдiң.
Иртен сығып, часхы кӱн,
Кӧзенеемнең пахладың.
Чағын килiп, часхы тан,
Чуртазымҷа ойладың.
Часхы тан, нота
Янв 2 2017
Сӧстерi М.Баиновти, кӧӧ Сибдей Томни
Алтын айахтығ азыӊны
Салғылдырбин даа алғайзыӊ.
Чазыхтығ чирге тӱс парзаӊ
Чайааныныӊ полза сыххайзыӊ.
Кӱмӱс айахтығ азыӊны
Кӧлбеӊнетпин дее iскейзiӊ.
Кӧрiнмес чирге тӱс парзаӊ
Худайыӊ полза сыххайзыӊ.
Янв 2 2017
Сӧстерi паза кӧӧ А.Саможиковти.
(Сибдей Том сарнааны хоостыра)
Улуғ хазанға мин хой идiн хайнадып,
Сахтап полбин турбын, аарлығ аалҷыларым.
Иртiңер, иртiңер улуғ стол кистiне,
Аарлығ аалҷыларым, аарлығ аалҷыларым.
Иртiңер, иртiңер алтын стол кистiне,
Аарлығ аалҷыларым, аарлығ аалҷыларым
Улуғ хазанға мин потхыны хайнадып,
Сахтап полбин турбын, аарлығ аалҷыларым.
Иртiңер, иртiңер улуғ стол кистiне,
Аарлығ аалҷыларым, аарлығ аалҷыларым.
Иртiңер, иртiңер алтын стол кистiне,
Аарлығ аалҷыларым, аарлығ аалҷыларым.
Улуғ хазанға айран асты турғып,
Сахтап полбин турбын, аарлығ аалҷыларым.
Ыр хозымы:
Иртiңер, иртiңер улуғ стол кистiне,
Аарлығ аалҷыларым, аарлығ аалҷыларым.
Иртiңер, иртiңер алтын стол кистiне,
Аарлығ аалҷыларым, аарлығ аалҷыларым
Янв 2 2017
Сӧстерi В.Майнашевти, Кӧӧ Г.Танбаевти.
«Хакасия»
Хаҷан иртiп пасха чир-суғларны,
Мин Чирi – суумзар хатап айланзам,
Чарых харах чазы харахтарымны
Ноға-да позы ла суғландарча.
Ыр хозымы:
Хакасия, мин дее ӧскем синде.
Минiң дее чӱреем, сыдап полбин,
Синнеңер сарнабысхан пiрсiнде –
Сарнапча ам даа ол тохтабин.
Мағаа кирек чоғыл сабланыс,
Пiр дее чазырбин чоохтирбын!
Чeреемнi ӧртепче ол ла хыныс
Синзер ле, чарых кӱннiг чирiм.
Кiчiг торғайах таа кӧк тигiрзер
Кӱн тооза, майығыс пiлбин, сыхча,
Ол даа позының чирiнеңер
Пар-чох кӧзiн салып ырлапча.
***
сл. В.Майнашев пер. Н.Ахпашева
«Хакасия»
Есть ли слова на свете такие –
высказать всё то, чем сердце полно?
Солнечный край мой, дали родные,
что с колыбели любить суждено.
Припев:
Хакасия! Хочу вновь признаться –
глядя на твой широкий простор,
сердце моё запело от счастья
и продолжает петь до сих пор.
Хакасия! К тебе возвращаясь,
край дорогой мой, родная земля –
радость в груди сдержать не стараюсь
светлые слёзы в глазах не тая.
Слышится мне – в просторе небесном
жаворонок звенит над землёй,
славит из сердца льющейся песней
степи любимые, край дорогой.
Дек 31 2016
Сӧстерi Г.Казачиновани, кӧӧ Г.Челбораковти.
Хайхастығ иир хуҷаанда
Хада пас чӧрчебiс.
Кӧгiлбей хан тигiрде
Чылтыстар майың кӧйче.
Паарсах чӱректерiбiс
Хада хоос сабылча.
Хара харахтарыбыс
Удур кӧрiсчелер.
Чоохтабаан чоохтарыбыс
Кӧгiске толчалар.
Чиит хыныс сӧстерi,
Ӱн чiдiп, хайылча.
Хайхастығ иир хуҷаанда
Пазох ла чӧрчебiс,
Кӧгiлбей хан тигiрде
Айның чолы тоозылча.
Янв 5 2017
Чайааным-худайым (Сӧс, кӧг ээзi пiлдiзi чох) — Толдырча Сибдей Том.
Сӧстер ээзi пiлдiзi чох, кӧӧ пiлдiзi чох. Тiлбестег Сибдей Томни.
Чайааным-худайым
1.
Чуртазымны чайап пирдің,
Чанымны чабырбадың,
Чалғызымны частыхтырбин
Позыңа син тартынғазың.
(ыр хозымы)
Мӧгі чуртаста адалғаным,
Синінең чарыхха салылғаным,
Кӱнде чӧрер, хараа полар,
Чайааным, Худайым минің…
2.
Пос холыңнаң син турғызып,
Хынызыңнаң аластаазың;
Сын чолыңӌа мині ызып,
Харасхыда тастатпаазың…
(ыр хозымы)
Мӧгі чуртаста адалғаным,
Синінең чарыхха салылғаным,
Кӱнде чӧрер, хараа полар,
Чайааным, Худайым минің…
3.
Хаӌан полза тузы читсе
Чолыңӌа мин айланарбын,
Тынам полза, тыным халза,
Сағаа пазох нандырарбын…
(ыр хозымы)
Мӧгі чуртаста адалғаным,
Синінең чарыхха салылғаным,
Кӱнде чӧрер, хараа полар,
Чайааным, Худайым минің…
Чайааным, Худайым минiң
By sarynzhy • Пiлдiзi чох, Пiлдiзi чох, Сарыннар сӧстерi, Сибдей Том •